ਦੇਸ਼

ਕੈਬਨਿਟ ਵਲੋਂ 7280 ਕਰੋੜ ਦੀ ਦੁਰਲੱਭ 'ਅਰਥ ਮੈਗਨੇਟ' ਸਕੀਮ ਨੂੰ ਮਨਜ਼ੂਰੀ

ਨਵੀਂ ਦਿੱਲੀ -ਚੀਨ 'ਤੇ ਧਰਤੀ ਦੇ ਦੁਰਲੱਭ ਚੁੰਬਕ ਪਦਾਰਥਾਂ ਨੂੰ ਲੈ ਕੇ ਨਿਰਭਰਤਾ ਨੂੰ ਘੱਟ ਕਰਨ ਲਈ ਬੁੱਧਵਾਰ ਨੂੰ ਕੇਂਦਰੀ ਮੰਤਰੀ ਮੰਡਲ ਨੇ 7280 ਕਰੋੜ ਰੁਪਏ ਦੇ ਉਤਸ਼ਾਹ ਪੈਕੇਜ ਵਾਲੀ ਨਵੀਂ ਯੋਜਨਾ ਨੂੰ ਮਨਜ਼ੂਰੀ ਦਿੱਤੀ ਹੈ | ਧਰਤੀ ਦੇ ਦੁਰਲੱਭ ਚੁੰਬਕਾਂ ਨੂੰ ਰਣਨੀਤਕ ਪੱਧਰ 'ਤੇ ਅਹਿਮ ਦੱਸਦਿਆਂ ਕੇਂਦਰ ਸਰਕਾਰ ਵਲੋਂ ਇਸ ਨੂੰ ਮਨਜ਼ੂਰੀ ਦਿੱਤੀ ਗਈ ਹੈ | ਕੇਂਦਰੀ ਸੂਚਨਾ ਅਤੇ ਪ੍ਰਸਾਰਨ ਮੰਤਰੀ ਅਸ਼ਵਨੀ ਵੈਸ਼ਣਵ ਨੇ ਜਾਣਕਾਰੀ ਦਿੰਦਿਆਂ ਕਿਹਾ ਕਿ ਧਰਤੀ ਦੇ ਦੁਰਲੱਭ ਚੁੰਬਕ ਉਤਪਾਦਨ ਸਕੀਮ ਦਾ ਮਕਸਦ ਅਹਿਮ ਖਣਿਜਾਂ ਲਈ ਦੂਜੇ ਦੇਸ਼ਾਂ 'ਤੇ ਨਿਰਭਰਤਾ ਘੱਟ ਕਰਨਾ ਅਤੇ ਸਪਲਾਈ ਚੇਨ ਨੂੰ ਮਜ਼ਬੂਤ ਕਰਨਾ ਹੈ | ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਦੀ ਅਗਵਾਈ ਹੇਠ ਹੋਈ ਕੈਬਨਿਟ ਮੀਟਿੰਗ 'ਚ ਇਸ ਯੋਜਨਾ ਨੂੰ ਮਨਜ਼ੂਰੀ ਦਿੱਤੀ ਗਈ, ਜਿਸ ਨਾਲ ਤਕਰੀਬਨ 6000 ਮੀਟਿ੍ਕ ਟਨ ਪ੍ਰਤੀ ਸਾਲ ਧਰਤੀ ਦੇ ਦੁਰਲੱਭ ਚੁੰਬਕ ਬਣਾਉਣ ਦੀ ਸਮਰੱਥਾ ਵਿਕਸਿਤ ਹੋਣ ਦੀ ਉਮੀਦ ਹੈ | ਇਹ ਯੋਜਨਾ ਸਟੀਲ ਇੰਡਸਟਰੀ ਇਲੈਕਟਿ੍ਕ ਵਾਹਨਾਂ, ਰੱਖਿਆ ਉਪਕਰਨਾਂ ਏਅਰਸਪੇਸ ਅਤੇ ਇਲੈਕਟ੍ਰਾਨਿਕਸ ਆਦਿ ਉਦਯੋਗਾਂ ਲਈ ਲਾਹੇਵੰਦ ਹੋਵੇਗੀ | ਵੈਸ਼ਣਵ ਨੇ ਕਿਹਾ ਕਿ 7 ਸਾਲ ਦੀ ਇਸ ਯੋਜਨਾ 'ਚ ਧਰਤੀ ਦੇ ਦੁਰਲੱਭ ਚੁੰਬਕ ਪਦਾਰਥਾਂ ਦਾ ਉਤਪਾਦਨ ਯੂਨਿਟ ਸਥਾਪਿਤ ਕਰਨ ਲਈ ਦੋ ਸਾਲ ਦਾ ਸਮਾਂ ਵੀ ਸ਼ਾਮਿਲ ਹੈ | ਇਸ ਤੋਂ ਬਾਅਦ ਚੁੰਬਕ ਦਾ ਨਿਰਮਾਣ ਕਰਨ 'ਤੇ ਪੰਜ ਸਾਲ ਤੱਕ ਉਤਸ਼ਾਹ ਪੈਕੇਜ ਦਿੱਤੇ ਜਾਣਗੇ | ਹਾਲਾਂਕਿ ਕੁਝ ਵਾਤਾਵਰਨ ਕਾਰਕੁੰਨਾਂ ਵਲੋਂ ਇਸ ਯੋਜਨਾ ਨੂੰ ਲੈ ਕੇ ਸਰੋਕਾਰ ਵੀ ਪ੍ਰਗਟਾਏ ਗਏ ਹਨ ਪਰ ਵੈਸ਼ਣਵ ਨੇ ਭਰੋਸਾ ਦਿਵਾਉਂਦਿਆਂ ਕਿਹਾ ਕਿ ਇਨ੍ਹਾਂ ਸਰੋਕਾਰਾਂ ਨੂੰ ਪੂਰੀ ਤਰ੍ਹਾਂ ਧਿਆਨ 'ਚ ਰੱਖਿਆ ਗਿਆ ਹੈ |