ਖੇਡ

FIFA World Cup 2026: ਸਪੇਨ ਨੇ ਸਾਊਦੀ ਅਰਬ ਨੂੰ 4-0 ਨਾਲ ਹਰਾਇਆ

18 ਸਾਲਾ ਲਾਮੀਨ ਨੇ 10ਵੇਂ ਮਿੰਟ ਵਿੱਚ ਕੀਤਾ ਗੋਲ; ਮਿਕੇਲ ਨੇ ਵੀ ਦੋ ਗੋਲ ਦਾਗੇ ਅਟਲਾਂਟਾ : 18 ਸਾਲਾ ਸਟਾਰ ਫਾਰਵਰਡ ਲਾਮੀਨ ਯਾਮਾਲ ਨੇ ਆਪਣੇ ਪਹਿਲੇ ਫੁਟਬਾਲ ਵਿਸ਼ਵ ਕੱਪ ਦੇ ਸ਼ੁਰੂਆਤੀ ਮੈਚ ਵਿੱਚ ਗੋਲ ਕਰਕੇ ਸਪੇਨ ਨੂੰ ਜਿੱਤ ਦਿਵਾਈ। ਐਤਵਾਰ ਨੂੰ ਖੇਡੇ ਗਏ ਮੁਕਾਬਲੇ ਵਿੱਚ ਸਪੇਨ ਨੇ ਸਾਊਦੀ ਅਰਬ ਨੂੰ 4-0 ਨਾਲ ਹਰਾ ਕੇ ਟੂਰਨਾਮੈਂਟ ਵਿੱਚ ਆਪਣੀ ਪਹਿਲੀ ਜਿੱਤ ਦਰਜ ਕੀਤੀ। ਯਾਮਾਲ ਨੇ ਮੈਚ ਦੇ 10ਵੇਂ ਮਿੰਟ ਵਿੱਚ ਮਿਕੇਲ ਓਆਰਜ਼ਾਬਾਲ ਦੇ ਨੀਵੇਂ ਕਰਾਸ ਨੂੰ ਗੋਲ ਵਿੱਚ ਤਬਦੀਲ ਕਰਕੇ ਸਪੇਨ ਨੂੰ ਲੀਡ ਦਿਵਾਈ। ਇਸ ਨਾਲ ਉਹ ਵਿਸ਼ਵ ਕੱਪ ਦੇ ਇਤਿਹਾਸ ਵਿੱਚ ਗੋਲ ਕਰਨ ਵਾਲਾ ਅੱਠਵਾਂ ਸਭ ਤੋਂ ਨੌਜਵਾਨ ਖਿਡਾਰੀ ਬਣ ਗਿਆ ਹੈ। ਪਹਿਲੇ ਮੈਚ ਵਿੱਚ ਕੇਪ ਵਰਡੇ ਖ਼ਿਲਾਫ਼ ਹੈਰਾਨੀਜਨਕ ਡਰਾਅ ਤੋਂ ਬਾਅਦ ਇਹ ਗੋਲ ਸਪੇਨ ਲਈ ਰਾਹਤ ਲੈ ਕੇ ਆਇਆ। ਯਾਮਾਲ ਦੇ ਗੋਲ ਤੋਂ ਬਾਅਦ ਮਿਕੇਲ ਓਆਰਜ਼ਾਬਾਲ ਨੇ 21ਵੇਂ ਅਤੇ 24ਵੇਂ ਮਿੰਟ ਵਿੱਚ ਦੋ ਗੋਲ ਕਰਕੇ ਸਪੇਨ ਨੂੰ ਮਜ਼ਬੂਤ ਸਥਿਤੀ ਵਿੱਚ ਪਹੁੰਚਾ ਦਿੱਤਾ। ਦੂਜੇ ਹਾਫ਼ ਦੀ ਸ਼ੁਰੂਆਤ ਵਿੱਚ ਮਾਰਕ ਕੁਕੁਰੇਲਾ ਦੇ ਸ਼ਾਟ ’ਤੇ ਹਸਨ ਅਲਤੰਬਾਕਤੀ ਦੇ ਆਪਣੇ ਹੀ ਗੋਲ ਨੇ ਸਪੇਨ ਦੀ ਲੀਡ 4-0 ਕਰ ਦਿੱਤੀ। ਸਪੇਨ ਦੇ ਕੋਚ ਲੁਈਸ ਡੇ ਲਾ ਫੁਏਂਤੇ ਲਈ ਇਹ ਨਤੀਜਾ ਵੱਡੀ ਰਾਹਤ ਲੈ ਕੇ ਆਇਆ, ਕਿਉਂਕਿ ਟੀਮ ਨੂੰ ਟੂਰਨਾਮੈਂਟ ਤੋਂ ਪਹਿਲਾਂ ਖ਼ਿਤਾਬ ਦੇ ਦਾਅਵੇਦਾਰਾਂ ਵਿੱਚ ਸ਼ਾਮਲ ਕੀਤਾ ਜਾ ਰਿਹਾ ਸੀ, ਪਰ ਪਹਿਲੇ ਮੈਚ ਵਿੱਚ ਉਸ ਨੂੰ ਨਿਰਾਸ਼ਾ ਦਾ ਸਾਹਮਣਾ ਕਰਨਾ ਪਿਆ ਸੀ। ਯਾਮਾਲ, ਜਿਸ ਨੂੰ ਭਵਿੱਖ ਵਿੱਚ ਲਿਓਨਲ ਮੇਸੀ ਅਤੇ ਕ੍ਰਿਸਟੀਆਨੋ ਰੋਨਾਲਡੋ ਤੋਂ ਬਾਅਦ ਫੁਟਬਾਲ ਦਾ ਸਭ ਤੋਂ ਵੱਡਾ ਸਿਤਾਰਾ ਮੰਨਿਆ ਜਾ ਰਿਹਾ ਹੈ, ਨੇ ਆਪਣੇ ਪ੍ਰਦਰਸ਼ਨ ਨਾਲ ਇੱਕ ਵਾਰ ਫਿਰ ਆਪਣੀ ਕਾਬਲੀਅਤ ਦਾ ਸਬੂਤ ਦਿੱਤਾ।