ਦੇਸ਼

ਸੰਵਿਧਾਨ ਰਾਸ਼ਟਰਵਾਦੀ ਸੋਚ ਅਪਣਾਉਣ ਲਈ ਮਾਰਗ ਦਰਸ਼ਕ ਦਸਤਾਵੇਜ਼-ਰਾਸ਼ਟਰਪਤੀ

ਪੰਜਾਬੀ ਸਮੇਤ 9 ਭਾਸ਼ਾਵਾਂ 'ਚ ਸੰਵਿਧਾਨ ਦਾ ਅਨੁਵਾਦ ਜਾਰੀ ਨਵੀਂ ਦਿੱਲੀ -ਸੰਸਦ ਦੇ ਸੰਵਿਧਾਨ ਸਦਨ 'ਚ ਬੁੱਧਵਾਰ ਨੂੰ ਮਨਾਏ 76ਵੇਂ ਸੰਵਿਧਾਨ ਦਿਵਸ ਮੌਕੇ ਰਾਸ਼ਟਰਪਤੀ ਦਰੋਪਦੀ ਮੁਰਮੂ ਨੇ ਪੰਜਾਬੀ ਸਮੇਤ 9 ਭਾਸ਼ਾਵਾਂ 'ਚ ਸੰਵਿਧਾਨ ਜਾਰੀ ਕੀਤਾ | ਪੰਜਾਬੀ ਤੋਂ ਇਲਾਵਾ ਮਲਿਆਲਮ, ਮਰਾਠੀ, ਨਿਪਾਲੀ, ਬੋਡੋ, ਕਸ਼ਮੀਰੀ, ਤੇਲਗੂ, ਉੜੀਆ ਅਤੇ ਅਸਾਮੀ 'ਚ ਵੀ ਸੰਵਿਧਾਨ ਜਾਰੀ ਕੀਤਾ ਗਿਆ | ਸੰਸਦ ਦੇ ਪੁਰਾਣੇ ਸੈਂਟਰਲ ਹਾਲ (ਹੁਣ ਸੰਵਿਧਾਨ ਸਦਨ) 'ਚ ਰਾਸ਼ਟਰਪਤੀ ਦਰੋਪਦੀ ਮੁਰਮੂ ਦੀ ਪ੍ਰਧਾਨਗੀ ਹੇਠ ਹੋਏ ਪ੍ਰੋਗਰਾਮ 'ਚ ਉੱਪ-ਰਾਸ਼ਟਰਪਤੀ ਸੀ. ਪੀ. ਰਾਧਾਕਿ੍ਸ਼ਨਨ, ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ, ਰਾਜ ਸਭਾ 'ਚ ਵਿਰੋਧੀ ਧਿਰ ਦੇ ਨੇਤਾ ਮਲਿਕਅਰਜੁਨ ਖੜਗੇ, ਲੋਕ ਸਭਾ 'ਚ ਵਿਰੋਧੀ ਧਿਰ ਦੇ ਨੇਤਾ ਰਾਹੁਲ ਗਾਂਧੀ ਸਮੇਤ ਸਾਰੇ ਮੰਤਰੀ ਅਤੇ ਦੋਵਾਂ ਸਦਨਾਂ ਦੇ ਸੰਸਦ ਮੈਂਬਰ ਸ਼ਾਮਿਲ ਹੋਏ | ਰਾਸ਼ਟਰਪਤੀ ਦਰੋਪਦੀ ਮੁਰਮੂ ਨੇ ਸੰਵਿਧਾਨ ਦੀ ਪ੍ਰਸਤਾਵਨਾ ਪੜ੍ਹ ਕੇ ਪ੍ਰੋਗਰਾਮ ਨੂੰ ਸੰਬੋਧਨ ਕਰਦਿਆਂ ਕੇਂਦਰ ਸਰਕਾਰ ਵਲੋਂ ਕੀਤੇ ਕੰਮਾਂ ਦੀ ਸ਼ਲਾਘਾ ਕਰਦਿਆਂ ਕਿਹਾ ਕਿ ਤਿੰਨ ਤਲਾਕ ਨਾਲ ਜੁੜੀ ਸਮਾਜਿਕ ਬੁਰਾਈ 'ਤੇ ਰੋਕ ਲਾ ਕੇ ਸੰਸਦ ਨੇ ਸਾਡੀਆਂ ਭੈਣਾਂ ਅਤੇ ਬੇਟੀਆਂ ਦੇ ਸਸ਼ਕਤੀਕਰਨ ਅਤੇ ਸਮਾਜਿਕ ਨਿਆਂ ਦੀ ਦਿਸ਼ਾ 'ਚ ਇਤਿਹਾਸਕ ਕਦਮ ਉਠਾਏ | ਉਨ੍ਹਾਂ ਜੀ. ਐਸ. ਟੀ. ਨੂੰ ਆਜ਼ਾਦੀ ਤੋਂ ਬਾਅਦ ਦਾ ਸਭ ਤੋਂ ਵੱਡਾ ਟੈਕਸ ਸੁਧਾਰ ਦੱਸਦਿਆਂ ਕਿਹਾ ਕਿ ਇਸ ਨੂੰ ਦੇਸ਼ ਦੇ ਆਰਥਿਕ ਏਕੀਕਰਨ ਨੂੰ ਉਤਸ਼ਾਹ ਦੇਣ ਲਈ ਲਾਗੂ ਕੀਤਾ ਗਿਆ | ਰਾਸ਼ਟਰਪਤੀ ਨੇ ਧਾਰਾ 370 ਨੂੰ ਦੇਸ਼ ਦੇ ਵਿਆਪਕ ਸਿਆਸੀ ਏਕੀਕਰਨ 'ਚ ਰੁਕਾਵਟ ਦੱਸਦਿਆਂ ਕਿਹਾ ਕਿ ਇਸ ਰੁਕਾਵਟ ਨੂੰ ਦੂਰ ਕਰ ਦਿੱਤਾ ਗਿਆ ਹੈ | ਉਨ੍ਹਾਂ ਕਿਹਾ ਕਿ ਨਾਰੀ ਸ਼ਕਤੀ ਵੰਦਨ ਕਾਨੂੰਨ ਔਰਤਾਂ ਦੀ ਅਗਵਾਈ ਵਾਲੇ ਵਿਕਾਸ ਦੇ ਇਕ ਨਵੇਂ ਯੁੱਗ ਦੀ ਸ਼ੁਰੂਆਤ ਕਰੇਗਾ | ਸਾਡਾ ਸੰਵਿਧਾਨ ਸਮਝ ਅਤੇ ਤਜਰਬੇ ਨਾਲ ਬਣਿਆ-ਸੀ. ਪੀ. ਰਾਧਾਕਿ੍ਸ਼ਨਨ ਉਪ-ਰਾਸ਼ਟਰਪਤੀ ਸੀ. ਪੀ. ਰਾਧਾਕਿ੍ਸ਼ਨਨ ਨੇ ਕਿਹਾ ਕਿ ਸਾਡੇ ਸੰਵਿਧਾਨ ਦਾ ਖਰੜਾ, ਬਹਿਸ ਅਤੇ ਉਸ ਨੂੰ ਭਾਰਤ ਮਾਤਾ ਦੇ ਸਾਡੇ ਮਹਾਨ ਨੇਤਾਵਾਂ ਨੂੰ ਸੰਵਿਧਾਨ ਸਭਾ 'ਚ ਅਪਣਾਇਆ | ਉਨ੍ਹਾਂ ਕਿਹਾ ਕਿ ਇਹ ਆਜ਼ਾਦੀ ਦੇ ਲਈ ਲੜਨ ਵਾਲੇ ਸਾਡੇ ਲੱਖਾਂ ਦੇਸ਼ਵਾਸੀਆਂ ਦੀ ਮਿਲੀ-ਜੁਲੀ ਸਮਝ ਤਿਆਗ ਅਤੇ ਸੁਪਨਿਆਂ ਨੂੰ ਦਰਸਾਉਂਦਾ ਹੈ | ਉਨ੍ਹਾਂ ਕਿਹਾ ਕਿ ਸਾਡਾ ਸੰਵਿਧਾਨ ਸਮਝ, ਤਜਰਬੇ, ਤਿਆਗ, ਆਸਾਂ ਅਤੇ ਉਮੀਦਾਂ 'ਤੇ ਬਣਿਆ ਹੈ | ਸੰਵਿਧਾਨ ਨਿਰਮਾਤਾਵਾਂ ਦੇ ਬਿਨਾਂ ਕਿਸੇ ਸਵਾਰਥ ਦੇ ਯੋਗਦਾਨ ਨੇ ਹੀ ਅੱਜ ਭਾਰਤ ਨੂੰ ਦੁਨੀਆ ਦਾ ਸਭ ਤੋਂ ਵੱਡਾ ਲੋਕਤੰਤਰ ਬਣਾਇਆ ਹੈ | ਨਿਆਂ, ਬਰਾਬਰੀ, ਸਨਮਾਨ ਦੀ ਗਾਰੰਟੀ ਦਿੰਦਾ ਹੈ ਸੰਵਿਧਾਨ-ਸਪੀਕਰ ਓਮ ਬਿਰਲਾ ਲੋਕ ਸਭਾ ਦੇ ਸਪੀਕਰ ਓਮ ਬਿਰਲਾ ਨੇ ਸੰਵਿਧਾਨ ਨਿਰਮਾਤਾਵਾਂ ਅਤੇ ਸੰਵਿਧਾਨ ਸਭਾ ਨੂੰ ਨਮਨ ਕਰਦਿਆਂ ਕਿਹਾ ਕਿ ਸੰਵਿਧਾਨ ਸਭਾ ਦਾ ਸੈਂਟਰਲ ਹਾਲ ਉਹ ਥਾਂ ਹੈ, ਜਿਥੇ ਸੰਵਾਦ ਅਤੇ ਵਿਚਾਰ ਮੰਥਨ ਤੋਂ ਬਾਅਦ, ਜਨਤਾ ਦੀਆਂ ਤਾਂਘਾਂ ਨੂੰ ਧਿਆਨ 'ਚ ਰੱਖਦਿਆਂ, ਸੰਵਿਧਾਨ ਨੂੰ ਆਕਾਰ ਦਿੱਤਾ ਗਿਆ ਸੀ | ਬਿਰਲਾ ਨੇ ਕਿਹਾ ਕਿ ਭਾਰਤ ਵਿਧਾਨ ਸਭਾ ਦੇ ਪ੍ਰਧਾਨ ਡਾ. ਰਾਜਿੰਦਰ ਪ੍ਰਸਾਦ, ਸੰਵਿਧਾਨ ਦੇ ਨਿਰਮਾਤਾ ਬੀ. ਆਰ. ਅੰਬੇਡਕਰ ਅਤੇ ਹੋਰ ਮੈਂਬਰਾਂ ਦੇ ਅਦਭੁੱਤ ਗਿਆਨ, ਦੂਰਦਿ੍ਸ਼ਟੀ ਅਤੇ ਸਖ਼ਤ ਮਿਹਨਤ ਕਾਰਨ ਸਾਨੂੰ ਅਜਿਹਾ ਮਹਾਨ ਸੰਵਿਧਾਨ ਹਾਸਿਲ ਹੋ ਪਾਇਆ ਹੈ, ਜੋ ਸਾਨੂੰ ਨਿਆਂ, ਬਰਾਬਰੀ, ਹਰ ਨਾਗਰਿਕ ਦੇ ਸਨਮਾਨ ਅਤੇ ਗਰਿਮਾ ਦੀ ਗਾਰੰਟੀ ਦਿੰਦਾ ਹੈ | ਇਕ ਮੰਚ 'ਤੇ ਨਜ਼ਰ ਆਏ ਸੱਤਾ ਅਤੇ ਵਿਰੋਧੀ ਧਿਰਾਂ ਸੰਵਿਧਾਨ ਦਿਵਸ ਦੇ ਮੌਕੇ ਪੁਰਾਣੀ ਸੰਸਦ ਦੇ ਸੈਂਟਰਲ ਹਾਲ 'ਚ ਕਰਵਾਏ ਪ੍ਰੋਗਰਾਮ 'ਚ ਪਾਰਟੀ ਲਾਈਨ ਤੋਂ ਉੱਪਰ ਉੱਠ ਕੇ ਸੱਤਾ ਅਤੇ ਵਿਰੋਧੀ ਧਿਰਾਂ ਦੀ ਇਕੱਠੀ ਸ਼ਮੂਲੀਅਤ ਵੀ ਨਜ਼ਰ ਆਈ, ਜਿੱਥੇ ਮੰਚ 'ਤੇ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ, ਰਾਜ ਸਭਾ 'ਚ ਵਿਰੋਧੀ ਧਿਰ ਦੇ ਨੇਤਾ ਖੜਗੇ, ਲੋਕ ਸਭਾ 'ਚ ਵਿਰੋਧੀ ਧਿਰ ਦੇ ਨੇਤਾ ਰਾਹੁਲ ਗਾਂਧੀ ਤੇ ਕੇਂਦਰੀ ਮੰਤਰੀ ਜੇ. ਪੀ. ਨੱਢਾ ਮੰਚ 'ਤੇ ਇਕੱਠੇ ਨਜ਼ਰ ਆਏ |